ტოტალური თეატრალური პრემია

ვიწვევთ თეატრალურ სფეროში მომუშავე პროფესიონალებს საქართველოდან მონაწილეობა მიიღონ  შესარჩევ კონკურსში ტოტალური თეატრალური პრემიის გუნდში  გასაწევრიანებლად ედინბურგის ფრინჯ ფესტივალის მსვლელობისას 2017 წლის აგვისტოში.   

ტოტალური თეატრალური პრემია (TTA) დიდი ბრიტანეთის ერთ-ერთი ყველაზე აღიარებული პრემიაა, რომელიც მხარს უჭერს თანამედროვე საშემსრულებლო ხელოვნების ფართო სპექტრს და ხელს უწყობს მისი ცნობადობის ამაღლებას დიდ ბრიტანეთში და მის საძღვრებს გარეთ. პრემიისთვის მონაწილეთა შერჩევა ყოველწლიურად იმართება მსოფლიოში უდიდესი არტ ფესტივალის - ედინბურგის ფრინჯ ფესტივალის ფარგლებში. ტოტალური თეატრალური პრემიის გუნდი აკვირდება  თეატრის  ინოვაციურ სახეობებს, რომლებიც ცდებიან კლასიკური თეატრის საზღვრებს;  მათ შორისაა,  შეთხზული  თეატრი (devised theatre), ლაივ არტი, ვიზუალური პერფორმანსი, მიმების თეატრი, თოჯინური, ფიზიკური, ექსპერიმენტული, ქორეოგრაფიული თეატრები, კლოუნების, ცირკის, ქუჩის, გარე სივრცეებზე ორიენტირებული და მაყურებლების ჩართულობაზე გათვლილი პერფორმანსები და ა.შ. 

2017 წელს ბრიტანეთის საბჭო  საშუალებას აძლევს თეატრის ექვსამდე პროფესიონალს საქართველოდან, ყაზახეთიდან, თურქეთიდან და უკრაინიდან მონაწილეობა მიიღოს შერჩევის პროცესში, რათა გახდეს ტოტალური თეატრალური პრემიის შემფასებელი ან ჟიურის წევრი. ბრიტანეთის საბჭო დაფარავს შერჩეული პირის საერთაშორისო მგზავრობის, საცხოვრებლის, სამივლინებო (დღიური) ხარჯების და ვიზის მოსაკრებლის ღირებულებას. 

ტოტალურ თეატრალურ პრემიაზე წარდგენილი სპექტაკლების შეფასება ხდება ბრიტანელი და უცხოელი ხელოვანების, კრიტიკოსების, პროდიუსერების, პრეზენტერების, აკადემიური წრეების წარმომადგენლების, თეატრის პროფესიონალებისგან შემდგარი შემფასებელბისა და ჟიურის ორი პანელის მიერ. ამ პროცესში მონაწილეობა არის  პროფესიული განვითარების და ახალი საერთაშორისო კონტაქტების დამყარების შესანიშნავი შესაძლებლობა. 

ტოტალური თეატრალური პრემიის საორგანიზაციო გუნდი  ედინბურგში უმასპინძლებს შემფასებლებს და ჟიურის წევრებს; გაუწევს მათ ინსტრუქტაჟს და დახმარებას; თითოეულ მათგანს მიამაგრებს  უკვე გამოცდილ მენტორს  და საერთაშორისო მასპინძელს შეფასების პროცესის საწყის ეტაპზე კონსულტაციების გასაწევად; შეიძენს სპექტაკლების ბილეთებს მათთვის; მოაწყობს შემფასებელთა და ჟიურის წევრთა შეხვედრებს დიდი ბრიტანეთის ხელოვნების ორგანიზაციების წარმომადგენლებთან და დამოუკიდებელ ხელოვანებთან და პროდიუსერებთან  დიდი ბრიტანეთის თანამედროვე საშემსრულებლო სექტორის მათთვის გაცნობის მიზნით.

კონკურსის მოთხოვნები

ტოტალური თეატრალური პრემიისთვის შერჩეული სპექტაკლების  შეფასებისთვის გვესაჭიროება  თეატრალური ხელოვნების პროფესიონალები მაღალი  პასუხისმგებლობის  გრძნობით,  დაინტერესებულნი  ახალი  ტალანტების  და გამორჩეულობის მოძიებით,  ახალი ტენდენციების იდენტიფიცირებით;  ადამიანები, რომლებსაც შესწევთ უნარი იყონ ობიექტურები,  სამართლიანები და  გახსნილები ახალი აღმოჩენების აღიარებისთვის და რომლებიც მზად არიან კითხვის ნიშნის ქვეშ დააყენონ საკუთარი გემოვნება  და გამოცდილება.

შერჩევის ძირითადი კრიტერიუმები:

  • თეატრის კრიტიკოსის, პროდუსერის, ფესტივალის ან ვენიუს მენეჯერის, ჟურნალისტის ან  თეატრის სფეროში  პროფესიულად მუშაობის მინიმუმ სამ- წლიანი გამოცდილება.
  • ინგლისური ენის კარგი ცოდნა (სასურველია ცოდნის CEFR დონე C1), რადგან ინგლისური იქნება სამუშაო ენა. ამის უზრუნველსაყოფად ფინალური ტურისთვის შერჩეულ კანდიდატებს მოუწევთ ბრიტანეთის საბჭოს ინგლისური ენის ტესტის ჩაბარება. 
  • ედინბურგში ყოფნა 3-19 აგვისტოს ან 16-26 აგვისტოს პერიოდში (მნიშვნელოვანი თარიღები იხილეთ ქვემოთ)
  • მზაობა ედინბურგიდან  დაბრუნების შემდეგ გაუზიარონ  მიღებული გამოცდილება  ადგილობრივ მედიას - პუბლიკაციებში, ინტერვიუებში და /ან ბლოგებში.
  • დიდი ბრიტანეთის და ჩრდილოეთ ირლანდიის გაერთიანებული სამეფოს ვიზისთვის მიმართვის უფლება.

ტოტალური თეატრალური პრემიის მიმდინარეობის პროცესი

  • მთლიანობაში, 12 დღის განმავლობაში, 25 ადამიანისგან შემდგარი თითოეული ჯგუფი  ნახულობს დაახლოებით 530 სპექტაკლს (5-16 აგვისტო); 
  • 35-საათიანი დინამიური და გულახდილი დისკუსიების და დებატების შემდეგ ჯგუფი კოლექტიურად და დემოკრატიულად იღებს გადაწყვეტილებას ფინალისტების შესახებ.  
  • საშუალოდ 30 სპექტაკლი გადადის ფინალურ ეტაპზე, სადაც მათ შემოქმედებას შეაფასებს ჟიურის წევრთა მეორე პანელი. ამ ეტაპზე ფინალისტი ხელოვანები და სპექტაკლები ჯგუფდებიან 5 კატეგორიის მიხედვით: ფიზიკური და ვიზუალური თეატრი; ინოვაცია, ექსპერიმენტი და ფორმასთან თამაში; იმედისმომცემი; ცირკი და ქორეოგრაფია.
  • ჟიურის წევრები მიმაგრებულები არიან კონკრეტულ კატეგორიებზე. ისინი 6 დღის განმავლობაში ნახულობენ ყველა სპექტაკლს თავის კატეგორიაში. ამის  შემდეგ იმართება საერთო 6 საათიანი შემაჯამებელი შეხვედრა. 
  • დაჯილდოების ცერემონიაზე წარმოდგენილია 7 ჯილდო 5 კატეგორიაში.

მნიშვნელოვანი თარიღები

22 მაისი - კონკურსის გამოცხადება საქართველოში, ყაზახეთში, თურქეთსა და უკრაინაში

12 ივნისი - აპლიკაციების მიღების ბოლო ვადა

23 ივნისი - შემფასებლების და ჟიურის წევრების გამოცხადება

5 ივლისი - გაერთიანებული სამეფოს ვიზაზე მიმართვის ბოლო ვადა

3-19 აგვისტო - შემფასებლების მგზავრობის თარიღები

16-26 - ჟიურის წევრების მგზავრობის თარიღები

როგორ შეგიძლიათ მონაწილეობის მიღება კონკურსში:

  1. ჩამოტვირთეთ და შეავსეთ სააპლიკაციო ფორმა. თუ გაქვთ, სააპლიკაციო ფორმასთან ერთად ასევე გამოგვიგზავნეთ  ინგლისურის ცოდნის დამადასტურებელი დასკანერებული დოკუმენტი (უნივერსიტეტის დიპლომი ან საერთაშორისო სერტიფიკატი (IELTS ან CAE). 
  2. კონკურსში მონაწილეობისთვის საჭირო დოკუმენტები 2017 წლის 12 ივნისის 23:00-მდე გამოგვიგზავნეთ ელექტრონულ მისამართზე tatia.gurgenidze@ge.britishcouncil.org.

     გთხოვთ სათაურის ველში მიუთითოთ: Total Theatre Awards application.

     დაგვიანებული აპლიკაციები არ განიხილება.

3. ფინალურ ტურში გასულ აპლიკანტებს დავუკავშირდებით 14-20 ივნისის პერიოდში და  დავუნიშნავთ ინგლისური ენის ტესტის ჩაბარების თარიღს. 

4. შერჩეული მონაწილე გამოცხადდება 24 ივნისს.

დამატებითი ინფორმაციის საჭიროების შემთხვევაში, გთხოვთ მიმართოთ ბრიტანეთის საბჭოს ხელოვნების პროგრამის მენეჯერს მაია დარჩიას ელექტრონულ მისამართზე: maya.darchia@ge.britishcouncil.org